Ысык-Көл облусунда өтө турган VI Дүйнөлүк көчмөндөр оюндарынын иш-чараларына билеттердин баасы аныкталды. Бул тууралуу Маданият, маалымат жана жаштар саясаты министрлиги билдирди.
Мекеменин маалыматына караганда оюндардын маданий жана спорттук иш-чаралары 1-6-сентябрь күндөрү Ысык-Көлдө бир нече локацияда өтөт.
Кырчын жайлоосунда өтө турган маданий жана спорттук иш-чараларга жана Курманжан Датка атындагы Көчмөндөр цивилизациясы борборуна кирүү акысыз болот. “Рух Ордо”, “Дордой Номад” амфитеатрында жана Чолпон-Атадагы ат майданда өтө турган маданий иш-чараларга билет баасы 500 сом болот.
Ал эми VI Дүйнөлүк көчмөндөр оюндарынын жабылуу аземине билеттер орундардын категориясына жараша төмөнкү баада сатылат:
борбордук жашыл сектордогу орундар — 4 000 сом;
ак сектордогу стандарттык орундар — 3 000 сом;
кызыл сектордогу стандарттык орундар — 2 000 сом;
сары сектордогу эконом орундар — 1 000 сом;
көк сектордогу эконом орундар — 500 сом;
Белгилей кетсек, VI Дүйнөлүк көчмөндөр оюндарынын ачылыш аземи 31-августта жаңы салынган “Бишкек арена” стадионунда өтөт. Ага билеттин баасы 5000 сом болору айтылган.
