Каза болгон адамдын электрондук капчыгында калган каражат мураскерлерге толук көлөмдө жана комиссия кармалбастан өткөрүлүп берилиши керек. Бул тууралуу Улуттук банктын методология жана төлөм системаларын көзөмөлдөө бөлүмүнүн башчысы Адилет Сыргатаев билдирди.
Анын айтымында, электрондук акча чыгарган уюм капчыктагы каражаттын толук суммасын кайтарып берүү үчүн жооптуу. Башкача айтканда, мураскерге акча өткөрүлгөндө эч кандай пайыз же комиссия алынбайт.
Каражатты алуу үчүн мураскер нотариуска кайрылышы керек. Тиешелүү документтер текшерилгенден кийин нотариус банкка же электрондук акча чыгарган уюмга кайрылуу жөнөтөт. Андан соң мураскер мурастоо укугу тууралуу күбөлүктүн негизинде электрондук капчыктагы каражатты ала алат.
Жаңы мыйзам электрондук акчаны мурастоо тартибин тактап, мураскерлердин, нотариустардын, банктардын жана төлөм уюмдарынын милдеттерин аныктайт. Буга чейин мындай маселелер жарандык мыйзамдардын жалпы нормалары менен гана жөнгө салынып келген.
