Кытайдын Чжанцзяган шаарында полиция союуга даярдалып жаткан миңден ашык мышыктарды куткарды. Бул тууралуу Meduza басылмасы жазып чыкты.
Маалыматка ылайык, жаныбарларды коргоочулар тобу көрүстөндүн жанынан мышыктар салынган көп сандагы кутуларды табышкан. Активисттер мышыктарды жүктөө үчүн көрүстөнгө жүк ташуучу унаа келгенче 6 күн күтүшкөн. Унаа келери менен полицияны чакырышкан. Жүк ташуучу унаа бара жаткан касапканадан укук коргоо кызматкерлери көптөгөн мышыктын өлүктөрүн табышкан. Активисттердин айтымында, жолбун мышыктарды кармап, андан кийин алардын этин чочконун же койдун эти деп сатышмак.
Полициянын маалыматына караганда, миңден ашык мышыктын этин сатуудан 20 миң доллардан ашык киреше көрүшмөк. Мышыктын этин кайра иштетүү менен алектенгендерден кимдир бирөө кармалганы тууралуу маалымат жок.
