Бүгүн, 26-январда Конституциялык Кеңешме Конституциянын жаңы редакциясынын долбоорун талкуулап жатат. Фундаменталдык өзгөрүүлөрдүн бири — депутаттык корпустун кыскартылышы.
Жыйындын төрагасы Бекбосун Бөрүбашев мыйзам долбоордо депутаттардын саны 90го чейин кыскаргандыгын, ошол эле учурда шайлоо тутуму өзгөрбөгөнүн билдирди.
«Биз депутаттардын санын жана мандаттын мөөнөттөрүн гана көрсөттүк. Шайлоо тутуму кандай болорун Жогорку Кеңеш өзү чечиши керек», — деди «Мамлекеттик бийликтин органдарынын» секциясынын башчысы Болот Токтобаев.
Бөрүбашев президенттик башкаруу формасына карабастан, Жогорку Кеңештин позициясы солгундабай тургандыгын, бийликтин бардык чөйрөсүндө чечим кабыл алууга катышарын кошумчалады.
Эске салсак, өткөн референдумда шайлоочулардын көпчүлүгү президенттик форманы колдошкон. Өлкөнүн башкы мыйзамынын тийиштүү долбоору Конституциялык Кеңешме тарабынан иштелип чыккан.
