Кыргызстандын кыз-келиндер күрөшү боюнча улуттук курама командасынын мүчөсү Айсулуу Тыныбекова Zagreb Open биринчи рейтингдик турниринде алтын медаль утту.
Кыргызстандык спортчу алтын үчүн күрөштө америкалык Кайла Киеко Миракл менен кез келип, атаандашын 7:0 эсебинде артта калтырды.
Мелдеш 10-14-январь күндөрү Хорватиянын Загреб шаарында өтүп жатат.
Финал үчүн беттеште Айсулуу Тыныбекова япониялык Сакура Мотоки менен күч сынашып, акыркы аракети үчүн япониялык балбанды 3:3 эсебинде жеңип алды.
Эскерте кетсек, өткөн жылдын сентябрь айында өткөн Дүйнө чемпионатынын финалдык беттешинде Айсулуу Тыныбекова Сакура Мотоки менен күч сынашып, аны 4:1эсебинде жеңип, Дүйнөнүн үч жолку чемпиону аталган.
