А.Малдыбаев атындагы Кыргыз улуттук академиялык опера жана балет театрынын солисттери — Кыргыз Республикасынын эмгек сиңирген артисти Заира Раимбекова жана эл аралык конкурстардын лауреаты Рыскелди Анаркул уулу Түркмөнстанда өткөн ТҮРКСОЙ эл аралык уюмунун Опера күндөрүнүн алкагында ийгиликтүү өнөр көрсөтүштү. Бул тууралуу маданият министрлиги билдирди.
ТҮРКСОЙдун эл аралык Опера күндөрү — түрк тилдүү өлкөлөрдүн опера ырчыларын бириктирген жана музыкалык мурастарды даңазалоого багытталган жыл сайын өтүүчү маданий фестиваль болуп саналат. Быйыл Ашхабад шаарында өткөн XXVII салтанаттуу иш-чаралар көрүнүктүү түркмөн композитору Вели Мухадовдун 110 жылдыгына арналды.
Опера күндөрүнүн алкагында Мукамдар сарайы эл аралык маданий диалогдун уникалдуу аянтчасына айланды. Азербайжан, Казакстан, Кыргызстан, Өзбекстан жана Түркиядан келген алдыңкы вокалисттер түркмөн кесиптештери менен бирге борбор калаанын сахнасында мыкты үн ээлеринин “кесиптик кароосун” сунушташты.
Кыргызстандык ырчылардын концерттик программасына түрк вокалдык классикасынын мыкты үлгүлөрү — Вели Мухадовдун чыгармалары, ошондой эле дүйнөлүк опера искусствосунун шедеврлери кирди. Алардын катарында Джузеппе Вердинин «Тагдырдын күчү» операсынан Леоноранын ариясы жана Умберто Джорданонун «Андре Шенье» операсынан Жерардын ариясы аткарылды.
Кыргыз артисттеринин ар бир чыгышы көрүүчүлөрдүн узакка созулган кол чабуулары менен коштолуп, вокалдык искусствонун күйөрмандары жана адистери тарабынан жогору бааланды.
