Кыргызстан менен Беларустун ортосундагы соода жүгүртүү акыркы үч жылда дээрлик эки эсеге өсүп, 2023-жылдагы 117 млн АКШ долларынан 2025-жылы 206,5 млн АКШ долларына жетти. Бул тууралуу тышкы иштер министри Жээнбек Кулубаев Беларустун тышкы иштер министри Максим Рыженков менен болгон эки тараптуу жолугушууда билдирди.
Министрдин айтымында, бул аралыкта Кыргызстандын Беларуска болгон экспорту 35 пайызга көбөйгөн.
Маалыматка ылайык, соода-экономикалык кызматташтык менен катар эки өлкөнүн келишимдик-укуктук базасы да чыңдалып жатат. Акыркы эки жылда өкмөттөр аралык деңгээлде түрдүү тармактарды камтыган 27 эки тараптуу документке кол коюлган.
Жээнбек Кулубаев акыркы жылдары өз ара кызыкчылык жараткан багыттар боюнча кызматташтык динамикалуу өнүгүп, системалуу мүнөзгө ээ болгонун белгиледи.
Ошондой эле ал Беларустун тышкы иштер министринин бул сапары эки өлкөнүн өнөктөштүгүн дагы да тереңдетүүгө жаңы дем берерине ишеним билдирди.
«Бүгүнкү жолугушуу бизге өз ара аракеттенүүнүн негизги багыттары боюнча пикир алмашууга жана кыргыз-беларусь мамилелерин мындан ары чыңдоонун келечегин белгилөөгө эң сонун мүмкүнчүлүк түзөт»,- деди Жээнбек Кулубаев.
