Кыргызстандын жалпы билим берүү мекемелерине 4 миң 500 нускада басылып чыккан “Балдар үчүн JavaScript” аттуу окуу куралы акысыз таратылат.
Агартуу министрлигинин маалыматына ылайык, китеп англис тилинен кыргызчага которулуп, “Таалим-Форум” коомдук фонду тарабынан басылып чыгарылган.
Бул окуу куралы буга чейин да 3 миң 500 нускада жарык көрүп, өлкөдөгү китепканаларга таратылган. Учурда анын экинчи басылышы чыгарылып жатат. Долбоор АКШнын Кыргызстандагы элчилигинин колдоосу менен ишке ашырылган.
Министрлик белгилегендей, китеп JavaScript программалоо тилинин негиздерин жөнөкөй жана түшүнүктүү тилде үйрөтүп, балдардын логикалык ой жүгүртүүсүн, чыгармачылык жөндөмүн жана маалыматтык технологияларга болгон кызыгуусун өнүктүрүүгө багытталган.
