Кыргызстанда алгачкы жолу уюштурулган UIM F1H2O “Суудагы Формула-1” боюнча дүйнө чемпионатынын Grand Prix of Kyrgyzstan этабы жыйынтыкталды. Баш байгени азыркы дүйнө чемпиону, Victory Team командасынын америкалык пилоту Шон Торренте жеңип алды.
Экинчи орунду швециялык Эрик Старк, ал эми үчүнчү орунду норвегиялык Марит Стрёмой ээледи.
Дүйнө чемпионатынын этабы Ысык-Көл облусунун Бает айылында атайын даярдалган 1 миң 929 метрлик, жети бурулуштан турган трассада өттү. Мелдешке дүйнөнүн 13 өлкөсүнөн сегиз эл аралык команда жана 18 пилот катышты.
Бул этап деңиз деңгээлинен 1 миң 607 метр бийиктикте өткөндүктөн, F1H2O дүйнө чемпионатынын тарыхындагы эң бийик тоолуу жарыш катары катталды.
Жарыштын жүрүшүндө спортчулар саатына 250 чакырымга чейин ылдамдыкты өнүктүргөн, ал эми 100 чакырым ылдамдыкка үч секундга жетпеген убакытта чыккан жогорку технологиялуу катамарандарда күч сынашты.
