Кыргызстандык төрт окуучу Ташкентте өткөн информатика боюнча эл аралык олимпиадада ийгилик жаратышты. Бул тууралуу Агартуу министрлигинен билдиришти.
Маалыматка караганда, жарыш 9–16-август күндөрү болгон. Олимпиадага 97 өлкөдөн 379 окуучу катышкан.
“Кыргызстандын командасындагы 4 окуучу тең медаль утту. Алар эки күмүш жана эки коло медалга ээ болушту. Командалык эсепте Кыргызстан 97 өлкөнүн ичинен 20-орунду ээледи. Бул — Кыргызстандын аталган жарышка катышуу тарыхындагы эң мыкты жыйынтык”, — деп айтылган маалыматта.
Төмөнкү окуучулар жеңишке жеткен:
Рамазан Мананов – “Амбассадор Интернешнл Скул” эл аралык мектеби;
Алихан Айдарбеков – “Амбассадор Интернешнл Скул” эл аралык мектеби;
Абдуллахан Абдирасулов – “Амбассадор Интернешнл Скул” эл аралык мектеби;
Ян Бобрус – “Газпром Кыргызстан” мектеби.
