Absolute Championship Akhmat (ACA) мушкерлер лигасынын кыргызстандык спортчусу Алтынбек Мамашов кезектеги атаандашын нокаут менен утту.
Маалыматка ылайык, Мамашов UFC уюмунун экс-мушкери, бразилиялык Элиас Сильверио менен кез келип, таймаштын экинчи раундунда аны сулата чапкан. Ээкке таамай тийген кубаттуу соккудан бразилиялыктын оозундагы тиш калканы (капа) ыргып кеткен.
Беттеш кечээ, 4-октябрда, Чеченстандын борбору Грозный шаарында өттү.
Кыргыз мушкери аталган уюмда буга чейинки үч беттешинин экөөсүн утуп, бирөөндө жеңилген. Мамашов ММА спортунда жалпысынан 17 беттешке чыгып, 15 учурунда атаандашын уткан. Бир жолу жеңилип, дагы бир кармашта тең чыккан.
Эскерте кетсек, Мамашовдун эстен тандырган соккусу Absolute Championship Akhmat лигасынын 2021-жылдын жарым жылдагы мыкты нокауту деп табылган.
