Кытайда чыгарылган электрондук чылымдарды Кыргыз Республикасына алып келип сатуу жана Россия Федерациясына транзиттик жол менен алып өтүү каналы аныкталды. Бул тууралуу УКМКнын басма сөз кызматы билдирди.
Маалыматка караганда, 21-апрелде Кылмыш-жаза кодексинин 208-беренесинин 3-бөлүгүнүн 2-пункту (Опузалап талап кылуу) менен чет элдик жарандан 50 миң доллар талап кылуу фактысы менен мурда укук коргоо органдарынын кызматкерлери болгон Кыргызстандын жараны И.М.Н. жана чет мамлекеттин жараны Э.Н.И. кармалды.
Аталган адамдар Кыргызстанга жана Евразия экономикалык биримдигине кирген мамлекеттерге сатуу максатында Кытайдан электрондук чылымдарды контрабандалык жол менен алып өтүүнү уюштурушканы аныкталган. Ошол эле учурда Кылмыш-жаза процессуалдык кодексинин 96-беренесине ылайык кармалгандар УКМК тергөө камак жайынын убактылуу кармоочу жайына киргизилди.
“Жунхай” базарынан аймагына бажы алымдарын төлөбөстөн ташылып келинген, жалпы 200 миң доллардан ашык сумманы түзгөн 70 миң даанадан ашык электрондук чылымдардын партиясы табылып алынды.
Азыркы учурда кылмыш ишинин алкагында көзөмөлдөөчү мамлекеттик органдардын кызмат адамдарынын бул мыйзамсыз иштерге катыштыгы бар экендигин, ошондой эле мамлекетке келтирилген зыяндын көлөмүн аныктоо боюнча ыкчам-тергөө иш-чаралар жүрүп жатат.
