Бишкекте кыздар социалдык тармактар аркылуу балдар менен таанышып, аларды каракчыларга салып берип турушкан. Бул тууралуу Биринчи май РИИБден билдиришти.
Маалыматка ылайык, 29-январда милицияга жаран арызы менен кайрылган. Анда, ошол күнү түнкү саат 02:30 чамасында Темиров көчөсүнөн курч темир буюм менен коркутуп, күч колдонуп, алдыңкы-үстүңкү тишин сындырып, «Айфон Х» маркасындагы телефонун жана 5 миң сом акчасын алып, качып кетишкен.
Аталган факт боюнча Кылмыш-жаза кодексинин 207-беренесине (каракчылык) ылайык кылмыш иши козголгон. Шектүүлөр кармалып, убактылуу кармоочу жайга киргизилди.
«Интернет аркылуу эркектер менен таанышып, жолугушуунун убактысын жана ордун дайындашкан. Андан кийин кезек-кезеги менен каракчылык кылган шериктерге кабар берип турушкан. Мыйзамсыз ишке жашы жете электердин тиешеси бар экени аныкталды. Кармалгандардан кылмыш жолу менен алынган уюлдук телефону табылды. Учурда тергөө иштери уланууда»,- деп айтылат билдирүүдө.
