Лейлекте уурдалган «Хундай Портер» унаасы табылды. Бул тууралуу Баткен ОИИБнын басма сөз кызматы билдирди.
Билдирүүгө ылайык, Лейлек районунун 50 жаштагы тургуну К.А. өзүнүн “Хундай Портер” үлгүсүндөгү унаасын белгисиз адамдар тарабынан уурдалгандыгын билдирип Лейлек РИИБне арыз менен кайрылган.
Бул арыз Лейлек РИИБдин Кылмыш жаза кодексинин 211-беренеси (Автомототранспорт каражаттарын айдап качуу) менен катталып, кылмыш иши козголгон.
Жүргүзгөн ыкчам иликтөө иштеринин жүрүшүндө Лейлек районунун Ак-Суу айыл аймагында убактылуу жашаган Чүй облусунун Сокулук районунун 27 жаштагы Р.С. аттуу тургуну Сүлүктү шаарында изин жашырып жүргөн жеринен аныкталып кармалды.
Учурда тергөө иштери жүрүп жатат.