Токмок шаардык салык кызматынын кызматкерлери кызматтык абалынан кыянаттык менен пайдалануу фактысы менен кармалды. Бул тууралуу УКМК билдирди.
Мамлекеттик салык кызматынын Токмок шаары боюнча мурдагы башчысы, киреше боюнча бөлүм башчысы, салык төлөөчүлөр менен иштөө бөлүмүнүн башчысы жана жеке ишкер кармалган.
Аталган кызматкерлер жеке ишкерге тиешелүү салык төлөмдөрүн төлөөдөн качуу максатында бир бүтүмгө келип алышып, мамлекеттик органдарга берилген отчёттук маалыматтарды атайылап бурмалашкан. Ошондой эле республикалык бюджетке 8 миллион 500 миң сомдон ашык зыян келтирилген.
Бул сумма мындан аркы тергөө-ыкчам иш-чараларынын жүрүшүндө көбөйүшү мүмкүн. Азыркы тапта иликтөө иштери жүргүзүлүүдө.
