Кыргыз Республикасынын Министрлер Кабинетинин төрагасы Адылбек Касымалиев жумуш сапары менен Екатеринбург шаарына келди.
Жумуш сапарынын алкагында Министрлер Кабинетинин Төрагасы бир катар эки тараптуу жолугушууларды өткөрүп, Иннопром эл аралык өнөр жай көргөзмөсүнө катышат. Ошондой эле көргөзмөнүн пленардык жыйынында сөз сүйлөп, өнөр жай тармагындагы кызматташтыкты кеңейтүү, инвестиция тартуу жана заманбап технологияларды өнүктүрүү маселелерине токтолот.
«Иннопром» эл аралык көргөзмөсү дүйнөнүн ар кайсы өлкөлөрүнөн келген өнөр жай ишканаларын, мамлекеттик органдарды жана инвесторлорду бириктирген ири аянтча болуп саналат. Анда металлургия, өндүрүш технологиялары, санариптик чечимдер, машина куруу жана өнөр жайды автоматташтыруу багытындагы алдыңкы жетишкендиктер сунушталат.
Иш сапардын жыйынтыгында эки тараптуу кызматташтыкты өнүктүрүүгө багытталган бир катар жолугушуулар жана сүйлөшүүлөр өткөрүлөрү күтүлүүдө.
