Бишкек шаарынын мэриясына караштуу «Бишкек жашыл чарба» муниципалдык ишканасына мыйзамсыз бак кыйганы үчүн айып салынды. Бул тууралуу Жаратылыш ресурстары, экология жана техникалык көзөмөл министрлиги билдирди.
Маалыматка ылайык, Instagram социалдык тармагында Жукеев-Пудовкин көчөсүндө бактардын кыйылып жатканы тартылган видео тарагандан кийин министрликтин кызматкерлери жеринде текшерүү жүргүзүшкөн.
Текшерүүнүн жыйынтыгында ишкананын кызматкерлери бактарды мыйзамсыз кыйганы аныкталып, муниципалдык ишканага 17 миң сом өлчөмүндө административдик айып пул салынды.
