Нарын дарыясына түшүп кеткен Ак-Талаанын тургуну Тогуз-Тородон изделүүдө. Бул тууралуу Тогуз-Торо райондук мамлекеттик администрациясынан маалымдашты.
Анын айтымында, Тогуз-Торо району боюнча өзгөчө кырдаалдар бөлүмүнүн кызматкерлери район аймагынан агып өткөн Нарын дарыясынын жээгинен балык кармап жатканда муз жарылып, сууга чөгүп кеткен Ак-Талаанын тургунун издеп жатышат.
«Тогуз-Торо району боюнча өзгөчө кырдаалдар бөлүмүнүн башчысынын убактылуу милдетин аткаруучу, капитан М.Шергазиевдин жетекчилиги менен бүгүнкү күнгө чейин Нарын дайрасынын жээгинде издөө иштери жүргүзүлүүдө. Тоолуу райондо суук -28…-30 градуска жетип, суу жээктеринде муз тоңуп калган. Күндүн сууктугуна карабастан кызматкерлер өз аракеттерин көрүп жатышат», — деп билдиришти акимчиликтен.
Белгилей кетсек, Нарын дарыясы менен Ала-Буга суусу кошулган аймакта Ак-Талаа районунун Баетов айылынын 1993-жылы туулган тургуну М.С. сууга түшүп кеткен. Ал шериги менен муз үстүндө балык кармап жатканда муз жарылган.
