Ош мамлекеттик университетинин клиникасында бир күндүк ымыркайдын жүрөгүнө татаал операция жасалды. Бул тууралуу окуу жай билдирди.
Маалыматка ылайык, наристе жүрөктүн тубаса оор кемтиги менен төрөлгөн. Дарыгерлердин консилиумунун чечими менен ага Рашкинд процедурасы жасалган.
Бул ыкмада хирургиялык кесүү талап кылынбайт. Атайын катетер сан же киндик венасы аркылуу жүрөккө киргизилип, анын учундагы кичинекей баллон жүрөктүн оң жана сол дүлөйчөлөрүнүн ортосундагы тешикти кеңейтет. Натыйжада кан айлануу жакшырып, организмдин кычкылтек менен камсыз болушу жогорулайт.
Дарыгерлердин маалыматына караганда, операция ийгиликтүү өтүп, учурда наристенин абалы канааттандырарлык.
