Ош шаарында өзгөчө оор кылмыштары үчүн кармалган кылмыштуу топтун мүчөлөрүнөн көп сандаган курал-жарактар табылды.

ИММден билдиришкендей, аталган эки учурда тең кылмыш ири суммадагы акчаны тартып алуу максатында жасалган.

«Кармалгандардын арасында Кыргызстан менен Өзбекстандын жарандары бар. Шектүүлөрдүн жашаган жерин тинтүү учурунда көп сандагы ок атуучу куралдар, анын ичинде автоматтар, снайпердик мылтыктар, пулемёттор, тапанчалар, ок-дарылар жана гранаталар табылып, тиешелүү экспертизалар дайындалды», — деп айтылат маалыматта.

Кармалгандардын арасында аялдар да бар. Ал Өзбекстандын жараны, Наманган облусунун тургуну 1987-жылы туулган У.С. (аял киши) Кыргызстандын аймагында мыйзамсыз жүргөн. Алдын ала маалыматтар боюнча, ал бир нече жыл мурда Тажикстан аркылуу өлкөгө кирген жана кармалган кылмыштуу топтун мүчөлөрүнүн биринин аялы болот.

Шектүүнүн башка бирөөнүн документин колдонуп жүргөнү дагы аныкталды. Анын Ош шаарындагы жашаган жерин тинтүү учурунда 37 жаштагы Кыргызстандын жаранынын атына даярдалган паспорт табылган.

Аталган бардык фактылар боюнча иликтөө иштери жүрүп жатат.