«ЗиЛ» тоо-лыжа базасында Пакистандын жараны сабалганы боюнча сотко чейинки өндүрүш иши башталды. Бул тууралуу Чүй ОИИБдин басма сөз кызматы билдирди.
Маалыматына караганда, окуя болгон күнү милицияга тоо-лыжа базасында мушташ чыккандыгы жөнүндө чакыруу келип түшкөн. Ал жерге Ысык-Ата РИИБдин ыкчам тергөө тобу барган. Аларга 2000-жылы туулган З.А. аттуу чет өлкөлүк жаран арыз менен кайрылып, аны сабаган белгисиз адамдарга чара көрүүнү суранган.
Бул факт КЖБРга Жоруктар жөнүндө кодексинин 119-беренеси (Майда ээнбаштык) менен катталган.
Мушташтын бир катышуучусу милицияга арыздануучу (чет өлкөлүк жаран) алардын буюмдарын аңтарып жатканын көрүп калганын билдирген. Андан кийин чыр чыгып, мушташып кетишкен. Учурда тергөө уланууда.
Белгилей кетсек, буга чейин социалдык тармактарда чет өлкөлүк жаранды сабап жатышкан видео тараган. Видеонун автору билдиргендей, окуя 17-январда болгон.
