Башкы прокуратура Курманбек Бакиев Кыргызстанга келсе дароо камакка алынарын айтты. Бул тууралуу басма сөз кызматы билдирди.
Маалыматка ылайык, эгерде Курманбек Бакиев Кыргызстандын аймагына келсе же укук коргоо органдары тарабынан алынып келинсе, 2016-жылдын 29-июлундагы соттун өкүмүнүн негизинде токтоосуз камакка алынат. Анткени, 2010-жылдын 7-апрелиндеги окуялар жана башка кылмыштары үчүн Бакиев соттун өкүмүнө ылайык 30 жылдык мөөнөткө эркиндигинен ажыратылып, өкүм күчүнө кирген.
Белгилей кетсек, «Кумтөр» алтын кенине байланышкан коррупциялык факт боюнча Улуттук коопсуздук мамлекеттик комитетинин ведомостволор аралык тергөө тобу тарабынан кылмыш иш тергелүүдө. Буга ылайык, 1992-жылдагы «Кумтөр» жөнүндөгү башкы келишимдин долбооруна, 1994-жылдагы ага киргизилген өзгөртүүлөргө, андан сырткары 2003-жылдагы «Камеко» компаниясы менен түзүлгөн башкы келишимди реструктуризациалоодогу коррупциялык аракеттери үчүн туңгуч президент Аскар Акаевге шектенүү жөнүндө кабарлама чыгарылган. Аталган иштин алкагында зарыл болгон тергөө аракеттерин жүргүзүү жана укук коргоо органдарындагы башка маселелерди тактоо үчүн 2-августта Аскар Акаев Бишкек шаарына алынып келинип, учурда тергөө органдары менен активдүү кызматташууда.