Президент Садыр Жапаров бүгүн, 28-апрелде, Катар мамлекетинин улуттук олимпиада комитетинин президенти шейх Жоан бин Хамад Аль Танини кабыл алды.
Анда спорттогу кыргыз-катар кызматташтыгын өнүктүрүү, олимпиадалык кыймылды илгерилетүү жана спорттук инфраструктураны чыңдоо маселелери талкууланды.
Садыр Жапаров Катар ири спорттук иш-чараларды өткөрүүдө эбегейсиз тажрыйба топтоп, спорттук инфраструктураны өнүктүрүп жана ири объектилерди курууда чоң ийгиликтерге жетишкенин белгиледи.
Мамлекет башчы Кыргызстанда олимпиадалык бассейн, бокс академиясы жана улуттук олимпиада комитетинин жаңы имараты сыяктуу заманбап спорттук объектилерди куруу үчүн Катардын тажрыйбасын жана инвестицияларды тартуу мүмкүнчүлүгүн карап чыгууну сунуштады.
Жоан бин Хамад Аль Тани Кыргызстан менен кызматташууну өнүктүрүүгө кызыкдар экенин билдирип, эки өлкөнүн спорттук байланыштарын чыңдоого багытталган сунуштарды кароого даяр экенин белгиледи. Ал Кыргызстандагы мектептерде сууда сүзүүнү өнүктүрүү боюнча долбоорду ишке ашырууну сунуштады.
Тараптар спорт тармагындагы кызматташтыкты өнүктүрүү Кыргызстан менен Катардын ортосундагы достук мамилени чыңдоого өбөлгө болоруна ишеним билдирди.
