Жалал-Абадда алдамчылыкка шектелип качып жүргөн жаран кармалды. Бул тууралуу Жалал-Абад ОИИБдин басма сөз кызматы билдирди.
Билдирүүгө ылайык, Жалал-Абад ШИИБге Ош областынын Өзгөн районунун 35 жаштагы тургуну арыз менен кайрылган. Анын арызында 2020-жылдын ноябрь айынын аяк ченинде Жалал-Абад шаарындагы автозокзалда “Алтынбек” аттуу таанышы алдоо жолу менен «Мерседес-Бенц 814» үлгүсүндөгү автоунаасын 550 000 сом акчага баалашып сатып жибергендигин билдирген.
Аталган факты боюнча Жазык кодексинин (эски редакция) 204-беренесинин (Алдамчылык) негизинде сотко чейинки өндүрүш иши башталган.
Жабырлануучу жана күбөлөрдүн көрсөтмөлөрүнүн негизинде окуяга шектүүнүн өздүгү такталып, ал Сузак районунун тургуну 1980-жылы туулган Р.А. экендиги аныкталган. Шектүү жашаган жерин өзгөртүп, тергөөдөн качып жүргөндүгүнө байланыштуу издөө жарыяланган.
Жүргүзүлгөн издөө иштеринин негизинде ушул жылдын 3-май күнү шектүү Ош шаарында жашырынып жүргөн жеринен кармалып, убактылуу кармоочу жайга киргизилген.