Таш-Көмүрдө сел жүрүп, турак үйлөрдү каптады. Бул тууралуу Өзгөчө кырдаалдар министрлигинин басма сөз кызматы билдирет.
Маалыматка ылайык, 23-май түнкү саат 00.30 чамасында Таш-Көмүр шаарында нөшөрлөп жааган жамгырдын натыйжасында сел жүрүп, шаардын Токтогул көчөсүнүн 5 жерине (жалпы узундугу 190метр) кум-шагыл түшүп (жалпы көлөмү болжол менен 180м3) жол каттамын тосуп калган. Жерине 1 автожүктөгүч, 1 автогрейдер, 1 автосамосвал тартылып, жол каттамы толук ачылды.
Ошондой эле сел суулары Токтогул кочөсүндөгү 17 турак үйдүн короолоруна кирип, алардын ичинен 9 турак үйдүн короосун ылай баскан, 3 турак үйдүн ашканасына сел суулары кирген. Короолор тургундардын күчү менен тазаланып жатат.
Таш-Көмүр шаары боюнча ӨКБнүн ыкчым тобу жана шаардык Жарандык коргоо кызматы жеринде тактоо жана уюштуруу иш-чарасын алып барууда.
