Бишкекте таштанды челектен жаңы төрөлгөн ымыркай табылды. Бул тууралуу Октябрь райондук милициясынан кабарлашты.
Маалыматка караганда, кечээ, 8-ноябрда, түнкү саат 23:30дар чамасында милицияга борбор калаадагы Элебаев көчөсүндөгү таштанды челекке белгисиз аял ымыркайды таштап кеткени тууралуу билдирүү түшкөн. Жерине тартип сакчылар барып, жаңы төрөлгөн наристени табышкан.
Учурда бул факт каттоого алынып, тергөө иштери жүрүп баштады. Ал эми ымыркай №1 төрөт үйүнө өткөрүп берилген. Анын абалы туруктуу экенин кошумчалашты.
