Кечээ, 27-апрелде Бишкек шаарындагы Улан-2 кичи районундагы батирдин терезесинин торуна кыпчылып калган 55 жаштагы киши куткарылганы маалымдалган. Октябрь РИИБинин басма сөз кызматы окуя боюнча толук маалымат берди.

Маалым болгондой, 2021-жылдын 19-мартында А.Т. аттуу жаран Д.Ч. аттуу адамга чара көрүп берүүнү суранып милицияга кайрылган. Анда анын 7-апрель көчөсүндөгү көп кабаттуу үйлөрдүн бириндеги батирине мыйзамсыз киргенин айткан.

Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган.

21-апрель күнү Октябрь РИИБинин кызматкерлери Д.Ч. аттуу жаранды кармап келип, ага чейин эки кылмыш иши боюнча сотко чейинки өндүрүш жүрүп жатканы аныкталган.

«Сурак учурунда шектүү аталган батирде мурда расмий түрдө ажырашып кеткен аялы С.А. менен жашагандыгын көрсөткөн. Жакында турак жай боюнча көйгөйлөр жаралгандыгына байланыштуу ал ашкере чараларды көрүп, терезеден кирүүгө аракет көргөнүн айткан», — деп жазылат маалыматта.