Жалал-Абад шаарынын аймагында орун алган Курорт тилкесиндеги мисте токоюнда 20-25 жаштагы адамдын жансыз денеси табылган. Анын киши колдуу болуп өлтүрүлгөнүн Жалал-Абад ОИИБнын басма сөз кызматы билдирди.
Бул факты боюнча топтолгон материал Жалал-Абад ШИИБге катталып, Жазык кодексинин 122-беренесинин (адам өлтүрүү) негизинде кылмыш иши козголуп, тиешелүү экспертизалар дайындалган.
Ыкчам иштердин жүрүшүндө маалым болгондой, маркум Жалал-Абад шаарынын 20 жаштагы тургуну болгон.
«Соттук-медициналык экспертизанын жүрүшүндө жансыз дененин баш бөлүгүнө келтирилген жаракаттан улам баш мээге кан куюлгандан улам каза болгондугу жана анын 7 кабыргасы сынгандыгы аныкталган» деп айтылат маалыматта.
Кылмышка шектелип, Сузак районунун 2001-жылы туулган тургуну кармалып, 2 айга камакка алынган. Учурда калган кылмыштуу шериктерин кармоо иштери жана тергөө амалдары жүргүзүлүүдө.