Сокулук районунда жарандын үйүнөн ири суммадагы акчасын жана зер буюмдарын уурдап кетип, «камри» үлгүсүндөгү унаа сатып алганга жетишкен жаран кармалды. Бул тууралуу 7-каналга Чүй ОИИБден билдиришти.

Маалыматка караганда, 16-октябрда Сокулук райондук ички иштер бөлүмүнө 1984-жылы туулган К.И аттуу айыл тургуну арыз менен кайрылып, белгисиз жаранга чара көрүүнү суранган. Анын айтымында, 15-октябрда саат 18:00дөн 02:00гө чейинки аралыкта анын үйүнө жашыруун кирип, уктоочу бөлмөсүнөн 2 млн сомун, 4 млн рубль, 5,5 миң доллар акчасын жана зер буюмдарын уурдап кеткен.

Аталган факты Сокулук райондук ички иштер бөлүмүнө катталып, Кылмыш-жаза кодексинин 205-беренесинин (уурдоо) негизинде кылмыш иши козголгон.

Жүргүзүлгөн ыкчам иш-чаралардын натыйжасында кылмышка шектүүнүн өздүгү такталып, ал 1984-жылы туулган А.М. аттуу жаран болгон. Шектүү убактылуу кармоочу жайга киргизилген.

Иликтөө иштеринин жүрүшүндө шектүү жабырлануучуга тиешелүү зер буюмдарын жана акча каражаттарын өз ыктыяры менен тапшырып берип, калган акчага 2016-жылы чыгарылган «Тойота Камри» үлгүсүндөгү унаа сатып алгандыгын айткан.

Учурда тергөө уланууда.