Орусиядагы Wildberries компаниясы кампалардагы окуядан жабыркаган кыргызстандык сатуучуларга жарым-жартылай компенсация төлөнгөнүн билдирди. Калган кенемте зыяндын көлөмү толук аныкталгандан кийин эсептелип чыгары айтылды.
Бул маселе экономика жана коммерция министри Бакыт Сыдыковдун төрагалыгы алдында өткөн жыйында талкууланды. Ага Wildberries компаниясынын өкүлдөрү, тигүү жана жеңил өнөр жай ассоциацияларынын, сатуучулардын жана жүк ташуучулардын өкүлдөрү катышты.
Жолугушууда жабыркаган ишкерлерди колдоо, электрондук сооданы өнүктүрүү жана кайрылууларды ыкчам кароо үчүн координациялык штаб түзүү чечими кабыл алынды. Ошондой эле Экономика министрлиги ишкерлерди колдоо боюнча кошумча мамлекеттик чараларды даярдап жатканын билдирди.
Эске салсак, июль айында Орусиядагы Wildberries компаниясынын бир нече кампасына жасалган чабуулдардан кийин жүздөгөн кыргызстандык ишкерлердин товарлары күйүп кеткен.
