Ысык-Көлдө COVID-19 илдетине каршы вакцинасын жети жерден алып жатышат. Бул тууралуу Саламаттык сактоо жана социалдык өнүктүрүү министрлиги кабарлады.
Маалыматка ылайык, Ысык-Көл облусунун жашоочулары коронавируска каршы вакцинаны үч шаардан жана төрт райондон ала алышат.
Ысык-Көл облусунда убактылуу жети пункт уюштурулган:
- Каракол шаарындагы облустук үй-бүлөлүк дарыгерлер борбору;
- Балыкчы шаарындагы «Ысык-Көл» үй-бүлөлүк дарыгерлер тобу;
- Түп райондук үй-бүлөлүк дарыгерлер борбору;
- Ак-Суу райондук үй-бүлөлүк дарыгерлер борбору;
- Чолпон-Ата шаарындагы жалпы дарыгерлик практика борбору;
- Тоң районундагы жалпы дарыгерлик практика борбору;
- Жети-Өгүз районундагы жалпы дарыгерлик практика борбору.
Эскерте кетсек, акыркы суткада облуста коронавирусту 28 киши жуктуруп, 22 адам айыкты.
