Социалдык тармактарда Ысык-Көлдө коюу кара түтүн чыгарып бара жаткан «Дария» теплоходунун видеосу тарагандан кийин Экологиялык жана техникалык көзөмөл кызматы текшерүү жүргүздү.
Жаратылыш ресурстары министрлигинин маалыматына ылайык, видеону изилдөө учурунда теплоходдон абага бөлүнүп чыккан зыяндуу заттар белгиленген ченемден ашып кеткени аныкталган.
Аталган факты боюнча теплоходдун ээсине карата Укук бузуулар жөнүндө кодекске ылайык протокол түзүлүп, анын жыйынтыгында 23 миң сом өлчөмүндө административдик айып пул салынды.
Ошондой эле теплоходдун ээсине жаратылышты коргоо мыйзамдарын так сактоо боюнча эскертүүлөр берилди.
«Акыркы текшерүүдө теплоходдон бөлүнүп чыккан зыяндуу заттардын көлөмү ченемден ашпаганы аныкталды. Экологдор көл үстүндөгү көзөмөлдү улантууда», — деп жазылат маалыматта.
