Жалал-Абадда улуттар аралык ынтымакты бекемдѳѳгѳ багытталган кичи футбол өткөрүлдү. Бул тууралуу Жалал-абад облустук милициясынын басма сөз кызматы билдирди.
Маалыматка ылайык, иш-чара 2010-жылы июнь окуясында кызмат ѳтѳѳ учурунда каза тапкан милициянын майору Мыктыбек Сулаймановдун жаркын элесине арналып, улуттар аралык ынтымакты бекемдөөгө багытталган.
Кичи футболго Жалал-Абад облусундагы Базар-Коргон районунун 9 айыл аймагынын командалары активдүү катышып, биринчилик үчүн күч сынашты. Жыйынтыгында жеңүүчү командага кубок, баалуу белектер, Базар-Коргон РИИБдин дипломдору тапшырылды.
Иш-чара учурунда милиция кызматкерлери келген конокторду спорттук таймаш аркылуу достукка чакырышты. Район аймагында улуттар аралык ынтымакты бекемдөө, жаштар арасында кылмыштуулуктун алдын алуу багытында түшүндүрүү иштери жүргүзүлдү.
