УКМК финансы-банк секторунун коопсуздугун камсыз кылуу боюнча иш-чаралардын алкагында трансулуттук уюшкан кылмыштуу топтун ишмердүүлүгүн аныктап, бөгөт койду.
Аталган топ Кыргызстандын жана Казакстандын аймагында 100 АКШ доллары номиналындагы ири суммадагы жасалма банкнотторду саткан. Ошондой эле, «Оптима Банк» ААКтын терминалдары аркылуу банктык карталарды толуктоо жолу менен жасалма акчаны «адалдоо» менен алектенип, Бишкек шаарындагы акча алмаштыруучу жайлар аркылуу да саткандыгы аныкталган.
45 миң АКШ долларынан ашык жасалма 100 долларлык купюралар аныкталып, мыйзамсыз жүгүртүүдөн алынган. Көрүлгөн чаралардын натыйжасында КР жарандары жана коңшу мамлекеттин жарандары кармалып, УКМКнын тергөө абагына киргизилди.
Ушундай эле факт менен буга чейин 50 миң жасалма АКШ долларын 20 000 (жыйырма миң) долларга сатууну көздөгөн КРнын жараны кармалган.
Учурда бул топко тиешеси бар адамдарды аныктоо боюнча ыкчам-иликтөө иш-чаралары улантылууда.
