Өлкөбүздө өтүп жаткан жергиликтүү кеңештердин депутаттарын шайлоодо Жол кыймылынын коопсуздугун камсыздоо башкы башкармалыгынын өздүк курамы шайлоо участокторуна бекитилип, бөлүнгөн чарчыларда коомдук коопсуздукту жана жол кыймылынын коопсуздугун камсыздашууда.
Айрыкча добуш берүүгө келген жарандарыбызга ыңгайлуу шарттарды түзүп, жол жээгиндеги унаалардын туура эмес жерлерге токтоолоруна жана жол тыгындарына жол бербөө үчүн тийиштүү тилкелерде жол кыймылын жөнгө салышууда.
Кызматкерлердин ишмердүүлүгүн ИИМдин Жол кыймылынын коопсуздугун камсыздоо башкы башкармалыгынын башчысы милициянын полковниги Жеңишбек Жоробеков жеринен текшерип, бул мамлекеттик маанидеги тарыхый күндөрдө милиция элдин коопсуздугунда болуусу, чагымчыл маалыматтардын же туура эмес көрүнүштөрдүн чыгып кетүүсүнө жол бербөө боюнча тийиштүү нускамаларды жеткирүүдө.
Ошондой эле ЖКККББнын башчысы шайлоо участокторуна бекитилген жергиликтүү бийлик органдарына, тийиштүү мамлекеттик кызматтарга, медицина кызматкерлерине, элдик кошуундарга жана укук коргоо органдарына кайрылып, жарандардын укуктарын сактоого, аларга ыңгайлуу шарттарды түзүүгө жана жалпы коопсуздукту камсыздоодо жигердүү жана күжүрмөн кызмат өтөп берүү зарыл экендигин эскертти.
