Кыргызстанда 1-сентябрдан тарта дарыгерлердин эмгек акысы 50 пайызга көтөрүлөт. Бул тууралуу саламаттык сактоо министринин орун басары Медербек Исмаилов Жогорку Кеңештин Социалдык саясат боюнча комитетинин жыйынында билдирди.
Анын айтымында, ал эми орто медициналык персоналдын эмгек акысы 20 пайызга, кенже медициналык персоналдын эмгек акысы 10 пайызга жогорулайт.
«Бул маселе чечилди. Президенттин жарлыгы даярдалып жатат. Ошондой эле колдоо катары 1-июлдан тарта айрым категориядагы дарыгерлерге 20 миң сомдон кошумча акы берилет», — дейт Исмаилов.
