Жогорку Кеңештин регламентине ылайык, депутаттар манжанын изи же адамдын жүзүн тааныган функциясы бар электрондук тутум менен добуш бериши керек. Бул туурасында парламенттин маалымат кызматы билдирди.
Маалыматка ылайык, депутаттарды каттоо жана добуш берүү процессинде манжа издерин колдонуу нормасы 2026-жылдын январында күчүнө кирет.
Учурда техникалык жактан камсыздалып, даярдык иштери жүрүүдө.
Регламент боюнча добуш берүүнүн ачык, бюллетендерди пайдалануу менен жашыруун добуш берүү сыяктуу түрлөрү бар. Депутат кайсы бир маселе боюнча өзү гана добуш бериши керек жана добуш берүү укугун башка депутатка өткөрүүгө тыюу салынат. Бирок ага карабастан буга чейин эл өкүлдөрү бири-бири үчүн добуш берип койгон учурлар көп болгон.
