Кыргызстан менен Казакстандын мусулмандарынын Дин башкармалыктары адал индустриясы жаатында кызматташуу боюнча меморандумга кол коюшту.
Маалым болгондой, документ адал стандарттарын өнүктүрүү, тажрыйба жана маалымат алмашуу, адистердин квалификациясын жогорулатуу жана адал сертификаттарын өз ара таануу багыттарын камтыйт.
Тараптар ошондой эле адал продукцияларын өндүрүү, сертификациялоо жана көзөмөлдөө боюнча алдыңкы тажрыйбаларды бөлүшүп, биргелешкен иш-чараларды өткөрүүгө макулдашты.
«Бул меморандум боордош Кыргызстан менен Казакстандын диний башкармалыктарынын ортосундагы көп тараптуу кызматташтыкты мындан ары да бекемдеп, эки өлкөдөгү адал индустриясынын системалуу жана туруктуу өнүгүшүнө жаңы мүмкүнчүлүктөрдү ачат деп күтүлүүдө», — деп айтылат маалыматта.
