Кыргызстанда мас абалда унаа башкарган айдоочуларга карата жоопкерчиликти күчөткөн мыйзам күчүнө киргенден кийинки бир ай ичинде 1,5 миңден ашуун мыйзам бузуу фактысы аныкталды. Бул тууралуу Ички иштер министрлиги билдирди.
Эске салсак, 2026-жылдын 20-июнунан тарта мас абалда унаа башкарган айдоочуларга карата жазаны катаалдаштырган мыйзамдагы өзгөртүүлөр күчүнө кирген.
Жаңы талаптарга ылайык, мас абалда унаа башкарган айдоочу 2 жылга айдоочулук күбөлүгүнөн ажыратылып, 80 миң сом айып пул төлөйт.
Ошондой эле мас абалда унаа башкаруунун кесепетинен адам каза болгон жол кырсыгы катталса, күнөөлүү адам 10 жылга чейин эркинен ажыратылып, 12 жылга чейин транспорт каражатын башкаруу укугунан ажыратылышы мүмкүн.
ИИМдин маалыматына ылайык, өлкөдө адам өмүрүн алган эң оор жол кырсыктарынын негизги себептери катары мас абалда унаа башкаруу, каршы тилкеге чыгуу жана белгиленген ылдамдыкты ашыруу саналат.
