Манас айылына жакын жерде жөө адамды сүзгөн мотоциклдин айдоочусу кармалып, Сокулук районунун убактылуу кармоочу жайына киргизилди. Бул тууралуу Чүй ОИИБдин басма сөз кызматынан билдирди.
Маалыматка ылайык, 2021-жылдын 10-сентябрында саат 19:30 чамасында Сокулук РИИБге Манас айылынын жанында мотоциклдин айдоочусу сүзүп кеткен жөө жүргүнчү тууралуу маалымат келип түшкөн.
Натыйжада милиция кызматкерлери тарабынан мотоциклдин 1992-жылы туулган айдоочусу Н.Ф. кармалган. Ал Сокулук районунун ички иштер бөлүмүнүн убактылуу кармоочу жайына киргизилди.
Бул факт Сокулук РИИБдин КЖБРне катталып, Жазык кодексинин 297-беренесинин («Жол кыймылынын жана автомототранспорт каражаттарын эксплуатациялоонун эрежелерин бузуу») негизинде сотко чейинки өндүрүшкө алынып, тергөө амалдары жүрүп жатат.