2012-жылдагы жана учурдагы жаңы түзүлгөн комиссиянын мүчөсү, депутат Айнуру Алтыбаева келишимдер бир жактуу, инвесторлордун кызыкчылыгына ыктап түзүлүп калган деген оюн билдирди.
“Келишимдер коррупциялык жол менен бир жактуу түзүлүп калган. Бул маселени 2011-жылдан бери эле көтөрүп келе жатабыз. Маселен, Өзбекстандан алтын казган АКШнын компаниялары казылган алтындын 30% гана алып, 70% мамлекетке калат. Бизде да ушундай чечим кабыл алынса болмок. Түшкөн пайданын канча бир пайызы деген менен, компания болушунча пайданын көлөмүн азайтып көрсөтүүгө аракет кылат экен”-дейт депутат.
Ошону менен бирге, алтын өндүрүүдө тонналаган булак суусу сарпталганы менен, аталган компания сууга акча төлөбөй келгенин айтты. Бул маселени комиссиялык текшерүү учурунда дагы көтөргөнүн кошумчалайт.
Кумтөр алтын кенин иштетүү үчүн Кыргыз өкмөтү 1992-жылы Канаданын Торонто шаарында “Камеко” корпорациясы менен Башкы макулдашууга кол койгон.
Кен жайы иштеп баштагандан бери ар кандай талаш-тартыштар менен катар келишимдердеги мүчүлүштүктөр тууралуу ызы-чуу токтобой келет. Ага ылайык, алтын өндүрүшүн иликтөө багытында бир нече комиссиялар түзүлгөн. Тагыраагы, 2007-жылы парламенттик жана өкмөттүк комиссия, ал эми 2012-жылы учурдагы мамлекет башчы Садыр Жапаров жетекчилик кылган депутаттык жана мамлекеттик комиссия иликтөө жүргүзгөн.
Депутат Акылбек Жапаров ошол учурда Жогорку Кенештин токтому кабыл алынып, бирок чечимдер толук аткарылбай калганын айтып келет.
Учурда, тиешелүү комиссиялардын буга чейинки чыгарган бардык чечимдерин кайрадан карап, алардын аткарылышын көзөмөлдөө багытында 2021-жылдын 17-февралында жаңы мамлекеттик комиссия ишин баштады.