Айсулуу Тыныбекова убактылуу интернет айдыңынан алыс болууну туура көрдү. Бул тууралуу мушкер айым өзүнүн Instagram баракчасына жазып, элге кайрылуу жасады.
Ал учурда Токиодо өтө турчу олимпиадага кызуу даярданып жатат.
«Урматтуу достор! Амансыздарбы? Менде болсо баары жакшы! Бул жыл мен үчүн абдан маанилүү. Себеби алдыда Токиодо өтө турчу Олимп оюндары улам барган сайын жакындап келе жатат. Машыгуу процесстери улам күчөп, жоопкерчилик артып жатат. Бизге талап катуу, тартип биринчи орунда. Мындан улам, социалдык тармактардан алысыраак болууга туура келип жатат. Азыр убактымды машыгууларга арнасам туура болот деп эсептейм. Менин чечимимди колдойсуздар деп ойлойм. Ушул себептен дос, туугандардан келип түшкөн каттарга, чакырууларга жооп бербесем кечирим сурайм. Убактылуу аккаунттарымды токтото турам. Элибизде тынчтык болсун! Рахмат!», — деп жазган.