Айзада Канатбекованын каргашалуу өлүмүнө себеп болгон жаран буга чейин Россияда 3 ирет сот жообуна тартылган. Бул тууралуу Бишкек ШИИБнин басма сөз кызматы билдирди.

Маалыматка ылайык, ал 2008-жылы Россиянын Омск шаарында уурулукка байланыштуу 3 ай абакта болгон.

2009-жылы талап-тоноо байланыштуу Красноярскта сот жообуна тартылган. Ал 2 жылга эркиндигинен ажыратылган.
2012-жылы каракчылык боюнча Москва шаардык соту 5,6 жылга эркинен ажыраткан. Күчөтүлгөн режимдеги түзөтүү абагында жаза өтөп, 2017-жылы эркиндикке чыгып Кыргызстанга кайтып келген.

Алгач кызды муунтуп өлтүрүп, андан соң өзүн-өзү өлтүргөн Теңизбаев Замирбек Абдыкаарыевич 1985-жылы 22-апрелде Ош облусунда төрөлгөн.

Бүгүн эртең менен Бишкек ШИИБ уюштурган маалымат жыйында З.Теңизбаев алгач батирде жашап жүрүп, акыркы 2-3 айда унаада жашаганы айтылды.

Ал эми ала качуунун курмандыгы болгон Айзаданын сөөгү Балыкчы шаарында жерге берилди. Ал үйдө жалгыз кыз, таята, таенесинин колунда өскөн. Ал эми кошуналары анын тартиптүү кыз экендигин эскеришти.