Ысык-Көл облусунда кум-шагыл аралашмасын жана кумдуу чопону казып алууга күбөлүктөрдү мыйзамсыз берүү фактысы боюнча иликтөө жүргүзүлүүдө. Бул тууралуу УКМК билдирди.
Маалым болгондой, тергөөнүн жүрүшүндө айрым кызмат адамдары мыйзам талаптарын бузуу менен жер казынасын пайдаланууга негиз болгон күбөлүктөрдү беришкени аныкталган. Ошондой эле пайдалуу кендерди казууда белгиленген тилкелердин чегинен чыгып кетүү фактылары катталган.
Алдын ала маалыматтар боюнча, мамлекетке келтирилген чыгым 14,2 миллион сомдон ашкан.
Кылмыш ишинин алкагында Ак-Суу райондук мамлекеттик администрациясынын башчысынын мурдагы биринчи орун басары Д.М.К. кармалды. Учурда тергөө иштери уланууда.
