Акыйкатчы Жамиля Жаманбаева Башкы прокуратурага жана ИИМге кайрылып, баласын көрө албай жүргөн жарандын арызы боюнча тез арада текшерүү жүргүзүүнү сунуштады.
Маалыматка ылайык, аял мурдагы күйөөсү сот чечимине карабастан кызын жашырып жүргөнүн билдирген. Сот баланы апасынын кароосуна өткөрүү тууралуу чечим чыгарганына карабастан, ал бүгүнкү күнгө чейин аткарылбай келет.
Акыйкатчы окуяга тиешеси бар сот аткаруучулардын, милиция кызматкерлеринин жана башка жооптуу адамдардын аракеттерине укуктук баа берүүнү жана бардык жагдайларды ар тараптуу иликтөөнү сунуштады.
