Бишкек шаарындагы «Алтын казык» конушунда жайгашкан кирпич заводунан чыккан кара түтүн тууралуу социалдык тармактарда тараган видеого байланыштуу тиешелүү мамлекеттик органдар текшерүү жүргүздү.
Жаратылыш ресурстары министрлигинин маалыматына ылайык, Экологиялык мониторинг департаменти, Экологиялык жана техникалык көзөмөл кызматынын Бишкек шаары жана Аламүдүн району боюнча башкармалыгы ишкананын жетекчилигинин макулдугу менен 17-июлда таңкы саат 04:00 чамасында заводдун аймагын толук текшерип, лабораториялык изилдөө үчүн атмосфералык абадан үлгүлөрдү алышты.
Текшерүүнүн жыйынтыгында заводдун аймагында синтетикалык материалдарды, желим калдыктарын же тиричилик таштандыларын өрттөө фактылары аныкталган жок.
Ал эми атмосфералык абадан алынган үлгүлөрдүн лабораториялык анализинин жыйынтыгы кийинчерээк белгилүү болору маалымдалды.
