Манас шаарындагы жаңы автобекеттин аймагындагы асфальт-бетон жабуусу сапат талаптарына жооп бербегендиктен кайрадан төшөлүүдө. Бул тууралуу шаар мэриясы билдирди.
Маалыматка ылайык, асфальт-бетон жабуусунун төмөнкү катмарын лабораториялык текшерүүдө бир катар кемчиликтер аныкталып, анын сапаты талапка жооп бербей турганы белгилүү болгон. Ушуга байланыштуу курулуш иштерин жүргүзгөн подрядчы уюм талапка жооп бербеген катмарды толугу менен алып салды.
Учурда автобекеттин аймагына сапат стандарттарына жооп берген жаңы асфальт-бетон катмары төшөлүп жатат.
Мэриянын маалыматына ылайык, аткарылган иштер кайрадан лабораториялык текшерүүдөн өткөрүлөт. Асфальттын сапаты бардык талаптарга жооп берери ырасталгандан кийин гана объект пайдаланууга кабыл алынат.
