Эл акыны Байдылда Сарногоевдин 90 жылдыгына арналган айтышта Акматбек Султан уулу баш байгени жеңип алды. Бул тууралуу Маданият, маалымат, спорт жана жаштар саясаты министрлигинин басма сөз кызматы билдирди.
Билдирүүгө ылайык, кечээ, 16- майда эл акыны Байдылда Сарногоевдин 90 жылдыгына карата өткөн эл аралык айтышта төкмө акын Акматбек Султан уулу баш байгени жеңип алган. Байгени Маданият, маалымат, спорт жана жаштар саясаты министри Азамат Жаманкулов тапшырды.
Министр сыйлык тапшыруу алдында учурда төкмөлүк өнөрдү өркүндөтүүгө мамлекет тарабынан колдоо үзгүлтүксүз улана турганын айтып, мындай айтыштар башка аймактарда да өткөрүлө тургандыгын белгилеп өттү.
Эске салсак аталган иш — чара Маданият, маалымат, спорт жана жаштар саясаты министрлиги, президенттин Талас облусундагы ыйгарым укуктуу өкүлчүлүгү, Улутту «Манас» театры жана Республикалык «Айтыш» коому биргеликте уюштурулган.
