Бишкекте батирге ууруга кирген шектүүлөр кармалды. Бул тууралуу Октябрь РИИБдин басма сөз кызматы билдирди.
Маалыматка ылайык, окуя 15-ноябрга караган түнү Рухий-Мурас конушунда болгон. Уурулар үйдөгү видеокамераны жулуп, андан кийин батирге ууруга киришкен.
Бул факт Кылмыштар жана жоруктардын бирдиктүү реестрине Жазык кодексинин 200-беренеси («Уурулук») менен катталды.
Ыкчам иликтөөнүн алкагында Октябрь РИИБдин кызматкерлери тарабынан 1995-жылы туулган Б.Б., 1992-жылы туулган К.К., 1987-жылы туулган К.Б. кармалды. Алар мурда да оор кылмыш менен сот жоопкерчилигине тартылган.
Шектүүлөрдү текшерүү учурунда 7 патрон (5,56 калибр, АКСУ) зер буюмдар жана видеокамера табылган. Унаасынан баңгизат салынган баштык да чыкты.
Тергөө учурунда башка дагы турак үйлөрдү тоногонун айтышкан. Тергөө, текшерүү иштери уланып жатат.