Бишкекте кафесин бир нече кардарларга сатып жиберген кожоюн кармалды. Бул тууралуу Октябрь РИИБдин басма сөз кызматы билдирди.
Маалыматка ылайык, 16-декабрда милиция кызматкерлерине Ахунбаев көчөсүндө жайгашкан «Nova» кафесинин кожоюнунун үстүнөн чара көрүү боюнча арыз келип түшкөн.
Арыз ээсинин айтымында, ал мурунураак аталган кафени сатып алган. Ал үчүн ээсине 2 бөлмөлүү батир, 877 миң 800 сомго бааланган 2 даана «Форд Мондео» унаасын жана 3 млн 310 миң сомдук «Мерседес Виано» унаасын берген. Кийинчерээк бул кафени ээси башка адамдарга кайра сатканын билген.
Бул факт Жазык кодексинин 204-беренеси (алдамчылык) менен катталып, Октябрь РИИБдин кызматкерлери тарабынан 1984-жылы туулган К.Д. шектелип кармалды. Ал убактылуу камакка алынып, тергөө уланып жатат.
